បន្ទាប់ពីផ្អាកការសម្តែងភាពយន្តអស់ជាច្រើនកន្លងមក ពិធីការិនីស្រស់សោភា កញ្ញា ហ៊ិន ចាន់នីរ័ត្ន បានសម្រេចចិត្តចេញថតរឿងឡើងវិញខណៈដែលតម្លៃខ្លួនឡើងដល់ជាង៥ពាន់ដុល្លារក្នុងមួយរឿង គឺជាកម្រិតឡើងទ្វេដង បើធៀបនឹងតារាដទៃ ។
ពិធីការិនីទូរទស្សន៍បាយ័នស្រីស្រស់ កញ្ញា ហ៊ិន ចាន់នីរ័ត្ន បានបង្ហាញវត្តមានដ៏គួរឲ្យភ្ញាក់ផ្អើលក្នុងការសម្តែងភាពយន្តបុរាណរឿង”ធ្មប់”របស់ផលិតកម្ម មាតុចក្រ ដែលជាការបើកឆាកថតកុនឡើងវិញ ។
យោងតាមការទម្លាយពីក្រុមការងារផលិតបានឲ្យភ្នាក់ងារយើងដឹងថា ទម្រាំនឹងតារាស្រីរូបនេះសម្រេចចិត្តចូលថតភាពយន្តវិញគឺមិនងាយទេ ពិសេសទាក់ទងនឹងពេលវេលា។ អ្វីដែលកាន់តែធ្វើឲ្យផលិតករភ្ញាក់ផ្អើលគឺការទាមទារតម្លៃខ្លួនថតមួយដ៏ខ្ពស់ស្ទើតែគុណនឹងពីរបើធៀបជាមួយនឹងតារាសម្តែងល្បីផ្សេងៗ។
ប្រភពដដែលបន្តថា តារាសម្តែងស្រីល្បីឈ្មោះខ្លះទទួលបានតម្លៃខ្លួនថតមួយរឿងប្រមាណពី ២ពាន់ ទៅ ៣ពាន់ដុល្លារអាមេរិកប៉ុណ្ណោះ ប៉ុន្តែហិន ចាន់នីរ័ត្នវិញឡើងដល់ជាង៥ពាន់ដុល្លារអាមេរិកសម្រាប់ការថតរឿងនេះ។ នាងសម្រេចចិត្តផ្តល់ពេលពេលា២ថ្ងៃប៉ុណ្ណោះក្នុងមួយសប្តាហ៍ ប៉ុន្តែនាងគោរពពេលវេលាបានល្អ។ ក្នុងរឿងនេះតម្រូវឲ្យមានតារាសម្តែងស្រីទន់ភ្លន់ស្រគត់ស្រគុំ ដូចជារូបនាង ហើយផលិតករចង់ឲ្យទស្សនិកជនប្លែកភ្នែកជាមួយស្នាដៃសម្តែងរបស់តារាស្រីរូបនេះគ្រាដែល តារាស្រី សុខ សោម៉ាវត្តី គឺបានចូលរួមសម្តែងស្ទើរគ្រប់ផលិតកម្មទៅហើយ។
ងាកមក ពិធិការិនីរូបស្រស់សម្ផស្សបាន កញ្ញា ហ៊ិន ចាន់នីរ័ត្ន ធ្លាប់បានប្រាប់ថា ការបាត់មុខលើវិស័យភាពយន្តជាង២ឆ្នាំមកហើយ អវត្តមានពីវិស័យនេះមិនមែនមកពីខ្លួនឈប់ថត ឬផលិតកម្មឈប់ហៅឡើយ ពោលមកពីមិនមានពេលគ្រប់គ្រាន់ និងតម្លៃថត មិនត្រូវថ្លៃគ្នា។ នាងថាកន្លងមកនេះមានផលិតករច្រើនបានទាក់ទង ចង់បាននាងទៅថតភាពយន្តឲ្យ ប៉ុន្តែនាងមិនមានពេលគ្រប់គ្រាន់ ត្បិតអីរាល់ថ្ងៃនាងត្រូវកាន់កម្មវិធីច្រើននៅស្ថានីយទូរទស្សន៍បាយ័ន។ តារាស្រីសម្រស់បានរូបនេះបញ្ជាក់ថា ក្នុងរយៈពេល១អាទិត្យនាងមានការងារនៅទូរទស្សន៍បាយ័នពី ៣ទៅ៤ថ្ងៃហើយ ពេលខ្លះចុះទៅខេត្តទៀត ។
សូមជម្រាបថា ពេលខ្លះនាងក៏ចង់ទទួលថតភាពយន្តដែរប៉ុន្តែមិនចង់ប៉ះពាល់ការងារស្នូលទើបបដិសេធ។ នៅ បាយ័ន ហ៊ិន ចាន់នីរ័ត្ន ក្តាប់បានកម្មវិធីកម្សាន្តចំនួន៤ ក្នុងដៃគឺកម្មវិធី "ឆា ឆា ឆា ", "ពិភពរីករាយ","វិស្សមកាលតន្ត្រី", និង”The Style”។ នាងមិនបានបញ្ជាក់អំពីតម្លៃខ្លួននៃការថតទេ ប៉ុន្តែអ្វីដែលសំខាន់ផងដែរនោះគឺគុណភាពរឿង ដើម្បីប្រាកដថាជារឿងដែលនឹងទទួលបានការគាំទ្រច្រើននៅពេលចាក់បញ្ចាំង។
អាចនិយាយបានថា ថ្មីៗនេះ មហាជនជាច្រើនមានការចាប់អារម្មណ៍ទៅលើសិល្បការិនីខ្មែរ កញ្ញា ហ៊ិន ច័ន្ទនីរ័ត្ដែលហ៊ានលះបង់កាត់សក់ខ្លីត្រឹមក ដើម្បីការងារថតសម្ដែងក្នុងភាពយន្តប្រវត្តិសាស្ត្ររបស់សម្ដេចតេជោ។ ពិតណាស់ ទោះបីបច្ចុប្បន្នទំនើប អាចមានសក់ក្លែងក្លាយទុកពាក់ពេលថត ប៉ុន្តែតារាស្រីទាំងនេះ គឺបានកាត់សក់ពិតៗខ្លួនសម្រាប់តម្រូវទៅតាមសាច់រឿង។
ពិធីការិនីកញ្ញា ហ៉ិន ច័ន្ទនីរ័ត្ន ជាតារាស្រីដែលមិនសូវទទួលថតរឿងប៉ុន្មានឡើយ តែថ្មីៗនេះនាងបានទទួលថតរឿងបែបប្រវត្តិសាស្ត្រ ហើយតម្រូវឲ្យនាងកាត់សក់ខ្លីត្រឹមក។ ក្រោយកាត់សក់ខ្លី នាងពិតជាប្រែសម្រស់ប្លែក ខណៈពីមុនមក ធ្លាប់តែឃើញនាងមានសក់វែង៕
