១. ស្នេហា ធ្វើឱ្យមនុស្សចេះលះបង់ និងផ្ដល់ឱ្យ
ស្នេហា គឺជាការស្រឡាញ់ ហើយការស្រឡាញ់ គឺជាការលះបង់ ស្រឡាញ់មនុស្សម្នាក់ គឺត្រូវលះបង់ និងផ្ដល់ឱ្យគ្រប់បែបយ៉ាង ដើម្បីស្នាមញញឹម និងក្តីសុខ ព្រមទាំងអនាគតមួយដ៏ល្អស់ម្រាប់គេដែរ។
ស្រឡាញ់មនុស្សម្នាក់ មិនចាំបាច់ថាត្រូវទទួលបានអ្វីពីគេមកវិញទេ ត្រឹមតែយើងអាចផ្ដល់នូវគ្រប់យ៉ាងសម្រាប់គេ វាជាការគ្រប់គ្រាន់ទៅហើយ។ ពេលខ្លះ ទោះមិនអាចបានរួមរស់ ឬបន្តអនាគតជាមួយគេក៏ដោយ ក៏យើងនៅតែពេញចិត្ត ដ្បិតអាចបានឃើញគេមានក្តីសុខ និងមានគ្រប់យ៉ាងនៅក្នុងជីវិត។
២. ស្នេហា ធ្វើឱ្យមនុស្សចេះថែរក្សាគ្នា
ជាការពិតណាស់ មនុស្សស្រឡាញ់គ្នា គឺទាមទារឱ្យមានការមើលថែរក្សាគ្នាទៅវិញទៅមក ក្តីប្រាថ្នារបស់មនុស្សយើងម្នាក់ៗ គឺតែងចង់មានអ្នកមើលថែរក្សានៅក្នុងជីវិត ពីក្មេង រហូតដល់ចាស់រៀងៗខ្លួន។
យ៉ាងណា ស្នេហា ការចេះថែរក្សា ការពារគ្នា គឺជាអារម្មណ៍មួយដ៏កក់ក្តៅ ក្រៅពីឪពុកម្ដាយ សាច់ញាតិក្រុមគ្រួសារយើង គឺយើងតែងចង់មានមនុស្សម្នាក់ចូលមករួមដំណើរជីវិត មានគេមើលថែយើងជំនួសឪពុកម្តាយយើង ហើយយើងក៏មើលថែគេ បំពេញតួនាទីល្អចំពោះគ្នា នេះជាអារម្មណ៍ស្នេហាមួយដែលពោរពេញទៅដោយគំនិតចាស់ទុំ និងត្រជាក់ត្រជុំខ្លាំងណាស់។
៣. ស្នេហា ធ្វើឱ្យមនុស្សចេះអភិវឌ្ឍខ្លួន
នៅពេលដែលយើងមានមនុស្សដែលយើងស្រឡាញ់ យើងតែងគិតដល់ចំណុចមួយគឺ អនាគតដ៏ល្អ
ដូច្នេះអ្វីដែលយើងត្រូវធ្វើគឺ ការអភិវឌ្ឍខ្លួនឯងឱ្យមានការរីកចម្រើនល្អជាងមុន ទាំងការសិក្សា ការងារនិងចិត្តគំនិតទៀតសោត។ មនុស្សយើងមិនអាចនៅតែបែបហ្នឹង ឬនៅតែប៉ុណ្ណឹងបានឡើយ ព្រោះយើងត្រូវមានគ្រួសារ យើងត្រូវរ៉ាប់រងលើជីវិតគ្រួសាររបស់យើង ដូចនេះ ត្រូវចេះផ្លាស់ប្តូរលើចិត្តគំនិត និងជីវិតខ្លួនឯង។ ម្យ៉ាងវិញទៀត ស្រឡាញ់មនុស្សម្នាក់ពិតប្រាកដ យើងនឹងដឹងថា តើយើងគួរធ្វើបែបណា គួរកែប្រែអ្វីខ្លះ ពេលដែលអ្នកបានជួបមនុស្សដែលច្បាស់លាស់ក្នុងជីវិត នោះអ្នកនឹងចេះអភិវឌ្ឍខ្លួនឯងជាចាំបាច់។
៤. ស្នេហា ធ្វើឱ្យមនុស្សចាស់ទុំជាងមុន
រឿងស្នេហា បើនិយាយចំពោះក្មេងៗ គឺមិនល្អទេនៅពេលដែលមនុស្សម្នាក់ចេះមានស្នេហាហើយ
ព្រោះក្មេងមិនសូវចេះគិតអ្វីឱ្យបានល្អិតល្អន់ឡើយ តែគេបានជួបមនុស្សដែលគេស្រឡាញ់ពេញចិត្តពិតប្រាដកហើយ ស្នេហានឹងធ្វើឱ្យគេក្លាយជាមនុស្សចាស់ទុំ ចេះគិតជាងមុន ចេះចង់មានចង់បាន នេះហើយដែលគេហៅថា ស្នេហា បង្រៀនឱ្យមនុស្សមានគំនិតចាស់ទុំ។ នៅពេលមនុស្សម្នាក់មានស្នេហា គេនឹងចេះគិតដល់ថ្ងៃអនាគត គេប្រាកដជាចេះពង្រឹងនូវស្មារតីរបស់គេ ចេះតស៊ូក្នុងជីវិត ចេះអត់ធ្មត់សង្កត់ចិត្តលះបង់ការសប្បាយភ្លើតភ្លើនភ្លេចខ្លួន ចេះអត់ឱនអភ័យទោស ចេះដឹងខុស ស្គាល់ត្រូវ ល្អអាក្រក់ ក្លាយជាមនុស្សម្នាក់ដែលផ្ទុយស្រឡះពីខ្លួនគេកាលពីមុន។
៥. ស្នេហា បង្រៀនឱ្យមនុស្សចេះប្រឈមមុខ
ជីវិតតែងមានរឿងជាច្រើនដើម្បីឱ្យយើងប្រឈមមុខ តែមនុស្សមួយចំនួន តែងតែខ្លាចរអា ខ្លាចនឹងការប្រឈមមុខទៅវិញ ប៉ុន្តែ បើដល់ពេលមួយ ពេលដែលមនុស្សម្នាក់បានជួវមនុស្សដែលគេស្រឡាញ់ពេញចិត្ត គេនឹងក្លាហានហ៊ានប្រឈមមុខនឹងរឿងគ្រប់យ៉ាង មិនថាល្អ ឬអាក្រក់ទេ ក៏គេមិនគេចវេស ជាពិសេសគឺ ប្រឈមមុខនឹងមនុស្សដែលគេស្រឡាញ់ ទោះម្នាក់នោះមិនស្រឡាញ់គេ ក៏គេនៅតែអាចប្រឈមមុខទទួលយកការពិត ហើយបើកចិត្តទូលាយថែមទៀតផង។
អំណាចនៃសេចក្ដីស្នេហា ពិតជាធំទូលាយ និងថ្លៃថ្លាណាស់ អត្ថន័យនៃស្នេហា ក៏រឹតតែធំធេង ដែលមិនអាចនឹងពណ៌នាបានច្បាស់នោះដែរ មានតែអ្នកមានស្នេហាពិតទេ ទើបយល់ថា ស្នេហា មានថាមពលនិងមានតម្លៃខ្លាំងកម្រិតណា។ ចុះសម្រាប់ប្រិយមិត្តទាំងអស់ តើស្នេហា មានអត្ថន័យបែបណាដែរ?
